Cumprindo co calendario electoral estipulado semanas atrás, o pasado xoves 5 de maio celebrábase a xornada de votación a Presidente da Federación Galega de Caza en Pontevedra.

Tras a elección do anterior Presidente Provincial, Javier Nogueira, como novo Presidente da Federación Galega de Caza, a provincia pontevedresa comezaba un novo proceso electoral na procura do seu substituto. Francisco Couselo, anterior Vicepresidente, foi o encargado de ocupar o posto en funcións durante esta época de transición.

Foron dous os candidatos presentados neste novo proceso democrático da sede federativa Pontevedra: Juan Ángel Alonso Pérez e Sinesio Soto Fernández, ambos cazadores e deportistas cinexéticos dende moitos anos atrás, e que veñen ocupando diversos postos relevantes na estrutura da FGC de Pontevedra.

A mesa electoral, que estivo composta por Rafael Sánchez Malvar, como Presidente; Álvaro Fontenla Filgueira, como Secretario; Hipólito Piñeiro, como Presidente da Xunta Electoral e Rubén Pato Álvarez, en calidade de Secretario da Xunta Electoral,  situouse para esta ocasión no Salón de Actos do Edificio Administrativo da Xunta de Galicia en Pontevedra.

A ela chegaron 61 dos 111 asembleístas convocados para estes comicios, que entre as 16.30h e as 19.30h da tarde puideron exercer o seu dereito a voto. Rematado o prazo de votacións, e tras realizar o escrutinio pertinente, o resultado foi o seguinte: Juan Ángel Alonso Pérez recibiu 58 votos, mentres que Sinesio Soto Fernández recibiu 3. Non houbo votos en branco ou nulos.

Pola mesa de votacións pasaron importantes personalidades federativas como Francisco Arturo Pichel, exPresidente da FGC e actual Delegado de Mutuasport, ou o actual Presidente da Federación Galega de Caza Javier Nogueira, que decidiu non exercer o seu dereito a voto.

Nos vindeiros días agárdase facer oficial a proclamación de Juan Ángel Alonso Pérez como novo Presidente da FGC en Pontevedra, que de inmediato pasará a tomar o mando a delegación provincial durante os vindeiros 4 anos.