O venres 28 de marzo, baixo a organización da Federación Galega de Caza na Coruña, tivo lugar unha xornada informativa e formativa sobre os Cans de Caza.

A Casa da Cultura de Ordes ateigouse con preto de 160 cazadores que recibiron información sobre lexistación, benestar, protección e as canceiras. Temática diversa que se dividiu en tres bloques e que permitiu aclarar conceptos sobre os sempre imprescindibles cans de caza, quedando patente a preocupación e implicación dos cazadores cos seus cans.

Realizada a recepción e entrega de documentación, o coordinador da xornada e presidente da FGC na Coruña, José María Álvarez Villar, deu a palabra a Rogelio Fernández Díaz, Xefe de Servizo de Patrimonio Natural na Coruña, o cal inauguraba a xornada agradecendo a alta participación na mesma así como a presenza de ponentes de prestixo na materia a tratar.

O primeiro bloque referido a normativa legal foi impartido por Diego R. Hidalgo, Tenente Xefe do Seprona da Garda Civil, e no cal se abordou a lei de protección e benestar animal de Galicia, así como o regulamento da lei de protección de animais domésticos e salvaxes en cautividade, para rematar cosa infraccións máis comúns na lei de benestar referida aos cans de caza.

O presidente da FGC e Doutor en Veterinaria, Luis Eusebio Fidalgo, desmenuzaba a súa ponencia no tocante as bases na alimentación canina, pautas de vacinación, desparistación e desinfección para rematar cos primeiros auxilios para os cans de caza e os seus trámites co REGIAC.

Remataba a xornada co bloque temático das canceiras particulres e deportivas, sendo impartido por José Manuel Matos Sobrino, biólogo e xestor cinexético. As diferenzas entre as canceiras particulares e deportivas así como a comunicación previa para a tenza de máis de 5 cans ou a documentación necesaria para a autorización de núcleo zoolóxico e o transporte de cans ocuparon a derradeira parte da xornada.

Unha xornada que contou coa colaboración Deputación da Coruña e valorada positivamente polo numeroso público asistente.