Campaña “A caza tamén vota”
Con motivo das vindeiras Eleccións Xerais do 23 de xullo, a Federación Galega de Caza (FGC) ven de rematar a campaña “A caza tamén vota: E de caza que?”, que en cada proceso electoral, dende hai varios anos, ven levando a cabo. Campaña que se enclava dentro do “Compromiso Político con la Actividad Cinegética” impulsado a nivel nacional pola Real Federación Española de Caza.
A finalidade desta iniciativa promovida pola FGC foi coñecer a postura dos diferentes grupos políticos sobre a caza en xeral e en Galicia en particular, para trasladarlla aos cazadores e cazadoras da nosa comunidade e que estes teñan a información que lles importa ao respecto da súa actividade de cara a exercer o seu dereito a voto.
Por este motivo, nos pasados días, convidouse ao PSOE, PP, VOX e BNG, a manter encontros coa FGC sobre a caza, ao tempo que solicitou a firma e o compromiso de aspectos relevantes para a proxección da caza na nosa comunidade. Un compromiso que, entre outros, atendía aos seguintes aspectos:
- Que a caza sexa recoñecida como actividade esencial
- Excluir ao lobo do LESRPE permitindo un control efectivo
- Favorecer a imaxe social da caza
- Que a caza este presente e representada nos órganos consultivos
- Realizar reunións de traballo cando exista un asunto de especial interese para a caza
A FGC informa que as forzas políticas do PSOE e BNG non atenderon a chamada da caza e non deron resposta ao encontro solicitado polo ente federativo.
O pasado 11 de xullo, a formación política VOX, representada por: Manuel Fuentes Lamas, candidato provincial da Coruña ao Senado e Eva María Castro Caridad, número dous por Coruña ao Congreso, mantiveron un encontro con representantes federativos durante o cal escoitaron e valoraron positivamente a actividade cinexética ao tempo que asinaron o compromiso coa actividade presentado pola FGC.
Foi o Partido Popular o que tamén escoitou, apoiou e asinou o compromiso cinexético da FGC despois da reunión mantida o pasado 14 de xullo entre a xunta executiva federativa e os seguintes representantes populares: Marisol Díaz Mouteira, coordinadora de Medio Ambiente da formación, Jose Manuel Barreiro, candidato ao Senado por Lugo e Xose Crespo Iglesias alcalde de Lalín e candidato ao Senado por Pontevedra.
Con esta campaña, a FGC non pretendeu politizar a actividade cinexética, senón todo o contrario, lamentando a non atención do PSOE e BNG. A Federación Galega como máximo representante do colectivo debe dar a coñecer aos cazadores galegos as posturas e programas dos diferentes partidos políticos respecto á caza.
