XIII Copa Federación de Cans de Rastro sobre Xabaril Salvaxe “Proba de Ceiba Terras do Ortegal”
O pasado 27 de maio, tiña lugar a XIII Copa Federación de Cans de Rastro sobre Xabaril Salvaxe “Proba de Ceiba Terras do Ortegal”, todo elo baixo a organización da Federación Galega de Caza na Coruña e coa colaboración das Sociedades de Cazadores de Ortegal, Mañón e Cedeira-Cerdido.
Como ocorreu na derradeira edición, participaron un total de 24 equipos compostos por ata tres conductores e 6 cans, participando de xeito directo os lotes campións das tres derradeiras edicións.
Os participantes contaron cun pequeno intervalo de tempo para facer unha comprobación de rastro previo a traela ou no seu caso o rexeitar ese rastro e empregar outro facilitado pola organización. Unha vez feita dita comprobación, tería lugar a solta dos cans no que estes dispoñían de 2 horas para facer o achegamento, levante e persecución do xabaril salvaxe.
Un ano máis Ortigueira foi un referente para os monteiros do norte de España e grazas ao éxito organizativo e traballo dos rastrexadores, guías e xuíces, contabilizáronse numerosos avistamentos de xabaril que fixeron as ledicias do numeroso público que seguiu o discorrer desta proba. Novamente participaron monteiros chegados dende Navarra, Cataluña, Cantabria e Asturias, así como representantes das catro provincias galegas. Un nivel moi alto que se viu reflexado na realización dos desencames de xabaril por máis do 90% dos lotes participantes.
Foi o lote dos monteiros lucenses Antón Arrojo Reguera e Óscar Díaz Gómez os que obtiveron o primeiro posto con 798 puntos e convertéronse nos campións desta XIII edición, participando cos cans de nome “Bimba, Lola, Pinta, Sol, Kira e Moro”. Tamén o can “Sol” integrante do lote campión obtivo o premio ao Mellor Can da Proba.
O coruñés Agustín Mosquera Taboada foi o lote subcampión despois de realizar a prestación cos seus gascóns “Odín, Lois, Paco, Sorda, Turca e Papi” e unha puntuación de 778 puntos.
O navarro, Andoni Saldias Larrayoz co seu lote de petits gascóns “Sol, Royal, Sua, Talis, Roya e Tequila” obtiña o bronce con 733 puntos.
Facemos mención a clasificación dos seguintes lotes:
4.- Alejandro Couso Rosario
5.- Pablo Martínez Castrillón
6.- Felipe Martínez Moyano
7.- Javier Arizkuren Pola
8.- Martín García Noya
9.- Elisa Amado Parga
10.- Santiago Varela Fontao
Un xantar de irmandade puxo o punto e final a este evento na que moitos monteiros xa agardan a celebración da edición do 2024 da proba de Ceiba de Terras do Ortegal.
Esta proba contou coa colaboración da Deputación da Coruña e co patrocinio da Secretaría Xeral para o Deporte, Proyecta Galicia, Mutuasport e Arión.
