A FGC lamenta que dende ATEGAL, da que forma parte algún exdirectivo da FGC, se aproveite a situación sanitaria para facer un ataque frontal á caza en particular e ao deporte galego federado en xeral.

As declaracións emitidas por esta asociación, con nula ou escasa representación no colectivo cinexético, contra a Federación Galega de Caza da que forman parte 20.000 cazadores e o 90 % dos Tecores galegos, resultan inadmisibles e van claramente encamiñadas, xunto con outras maniobras, a intentar que a Administración prohiba que os cazadores federados poidan cazar.

O único que se pretende dende esta asociación, baixo unha pretendida defensa da caza, de todos os cazadores e da saúde pública, é danar aos cazadores federados, só así se pode entender a contradicción de pasar de solicitar días atrás que a caza sexa actividade esencial a pedir agora que se paralice a caza.

Xa a mediados do mes de outubro a Real Federación Española de Caza a nivel nacional e a Federación Galega de Caza a nivel autonómico solicitaron a necesidade da declaración da caza como actividade esencial, sempre respetando os protocolos sanitarios, e baixo a necesidade do control de especies como por exemplo o xabaril para evitar danos en cultivos e estradas e poder así cumprir os cupos de capturas.

É preciso lembrar que as medidas adoptadas pola Xunta de Galicia con respecto ao deporte federado non só afectan á caza, senón que afectan a un total de 58 federacións deportivas galegas e a máis de 274.000 deportistas federados galegos entre os que se atopan os cazadores.

A FGC é a única entidade de representación do colectivo cinexético que ten elaborados e aprobados os seus protocolos anticovid para a práctica cinexética.