Tal e como estaba previsto, o pasado día 11 de xuño disputouse na localidade ourensá de Lobios, baixo as organización da Federación Galega de Caza desta provincia e a colaboración da Sociedade locataria “Río Caldo Manín e Quintela”, o “VII Campionato de Cans de Rastro Atrelados”. Unha vistosa competición, sucedánea dunha xornada real de caza da especialidade, que era puntuable para seguinte fase da modalidade e que foi seguida por moitos cazadores e curiosos, desenvolvéndose baixo unha climatoloxía propicia, entre ás 10 da mañá e ás tres da tarde.
Da dirección ocupouse o federativo ourensán, Xosé Castro Rivela. De xulgar os competidores, Emilio Vila, e colaborando toda a mañá, Manuel Feijoo, federativo e Domingo Veloso, Presidente do Tecor anfitrión. Participaron 12 cans e estes foron os mellores:
- 1º e campión, Salvador Sestelo Núñez (Tomioño-Pontevedra), con 237 puntos. Participou co can astur-cántabro “Vikingo”.
- 2º e subcampión, Xosé Luís Iglesias (Coruña), con 22 puntos. Competiu co sabuxo “Cañón”
- 3º, Antonio Sánchez Sesto (Silleda-Pontevedra), con 207 puntos. Cazou co grifón azul de Gascuña, “Tito”.
- Campión Provincial de Ourense, Noel Vázquez Rodríguez, (Corneira-Carballeda de Avia), con 177 puntos. Actuou con grifón azul de Gascuña, “medallas”.
Un xantar de confraternidade levado a cabo no Hotel Balneario Caldaria (Río Caldo), que presidiu a nova Alcaldesa de Lobios, Mª del Carmen Yáñez, e no que tomaron tamén parte varios concelleiros, presidentes de Tecores do lugar e amigos do deporte de caza, serviu de broche final a unha xornada competitiva de caza para enmarcar. O remate da mesma entregáronse os correspondentes trofeos e agasallos aos gañadores.
