Tendo de escenario terreos do Municipio de Baltar e de organización á Federación Galega de Caza de Ourense, a que contou coa colaboración da Sociedade Venatoria Locataria, o pasado día 21 de xuño disputouse o Campionato Provincial de Rastro de Xabaril. Cita deportiva á que acudiron un total de 10 competidores e 18 cans, actuando de xuíces os titulares Alejandro González e Xosé Montoiro.
O exercicio, que comezou máis tarde do previsto (sobre das 10 h.) e rematou más axiña do que se agardaba (13,30 h.), desenvolveuse no campo denominado a “Labrada Vella”. A final foi levada a cabo no termo da “Viduesa”, onde se acadaran as mellores marcas da proba.
Clasificación
A clasificación nos primeiros postos quedou deste xeito:
1º e campión da proba, “Cho”, de Francisco Rodeiro Eiras, con 219,5 puntos.
2º e subcampión, “Piñón”, de Álvaro Fontenla, con 212,5 puntos.
3º “Rato” de Francisco Rodeiro Eiras, con 211 puntos.
4º “Tito”, de Antonio Sánchez Sesto, con 208 puntos.
5º “”Vikingo”, de Salvador Sestelo Núñez, con 193 puntos
6º e campión provincial de Ourense, “Olé”, de Jesús Ares, con 187 puntos.
O Campionato foi seguido por bastantes afeccionados e curiosos e concluído o exercicio e xa coñecidos os resultados, levouse a cabo un xantar de confraternidade que resultou tan ameno como agradable dada a camaradería, unión e deportividade amosada, ao igual que durante toda a xornada, polos participantes. Foi ao remate da comida cando se procedeu á entrega de trofeos e á clausura do evento, correndo tódolos actos oficiais a cargo do federativo Manuel Feijóo e do Presidente da sociedade local, Manuel Díaz Sueiro. Quen non puido estar foi o federativo José Castro Rivela, quen momentos antes recibiu a mala nova do falecemento da súa nai e a quen queremos acompañar no sentimento e darlle ánimos dende esta páxina.
