Artemio Formoso ven de proclamarse campión do Mundo de Compak Sporting na modalidade de Handisport mentres que o seu compañeiro Anxo Mosquera –actual bicampión de España de tiro cinexético- foi cuarto co equipo Español de Superveteranos.

O Secretario Xeral para o Deporte, José Ramón Lete Lasa, ven de recibir aos tiradores galegos, Artemio Formoso Barro da sociedade Peña Revolta de As Pontes, e ao ferrolán Anxo Mosquera Rodríguez da sociedade santiaguesa Río Sar, que se proclamaron o pasado fin de semana  en Benamejí (Córdoba) campión do Mundo de Compak Sporting na modalidade de handisport –disminuidos físicos- e cuarto por equipos en superveteranos, respectivamente.

O Secretario Xeral tras felicitar aos deportistas mantivo unha longa conversa interesándose polos pormenores da competición e da caza en xeral.

O presidente da Federación Galega de Caza, José María Gómez Cortón, que acompañou aos cazadores galegos á audiencia co máximo responsable do Deporte Galego, salientou non só o labor e o extraordinario mérito deportivo destes tiradores de élite senón a súa capacidade de superación e sacrificio a nivel persoal. Gómez Cortón engadía “ante unha situación tan dificil como a vivida por estes dous campións, hai dúas fórmulas,  quedarse na casa vendo a vida pasar, ou saír a enfrontarse a ela e vivila. Os nosos deportistas afortunadamente elixiron a última, enfrontáronse  ás adversidades e hoxe recollen o seu merecido recoñecemento”.

Formoso Barro, cazador de toda unha vida, comeza a practica-lo tiro fai apenas 5 anos. Na tempada 2010, tras sufri-lo ano anterior un accidente de moto que o deixa manco,  compite na categoría de handisport, na que ven de proclamarse campión de España de Percorridos de Caza (Rio Sar, 2-4 de xullo) e a pasada fin de semana campión do Mundo de Compak Sporting (Benamejí, 26-29 de agosto).  Formoso recoñece que o deporte, máis concretamente o tiro,  foi o estímulo que o axudou a non caer na desesperación, e pretende co seu exemplo animar a outros disminuidos físicos á práctica deportiva; seguro que este pontés de apenas 40 anos e con forte personalidade será todo un referente na loita pola igualdade dos discapacitados.

O seu compañeiro, Mosquera Rodríguez, conta cun envexable palmarés, o máis premiado entre os deportistas cinexéticos galegos, casualmente os seus múltiples éxitos deportivos comeza a colleitalos tras sufrir un desgraciado accidente de tiro durante unha competición que o deixa mancado nunha perna. Ante ese infortunio, que coincide co cambio de categoría de Mosquera, pasando de sénior a veterano, nos últimos 10 anos Mosquera recolleu 14 titulos nacionais (campionatos de España) –sete medallas de ouro, catro prata, e unha de bronce, ademais dun cuarto o un quinto posto- e 8 títulos internacionais (campionatos de Europa e do Mundo) –dúas medallas de prata, dúas de bronce, un cuarto e tres quintos postos-. No 2010, superados os 65 anos, compite na categoría de superveteranos proclamándose campión de España de Compak Sporting e campión de España de Percorridos de Caza, así como cuarto no Campionato do Mundo de Compak co equipo español.