O evento está organizado pola asociación cultural, deportiva, ambiental e da terceira idade A Ouriceira e a sociedade de cazadores do Incio. A partir das dúas da tarde os comensais gozaron, previa retirada dos cartóns, de petiscos de empanada e carne de xabaril. Na festa degustáronse uns 200 quilogramos desta comida procedentes de seis exemplares cazados nos montes do concello polas tres cuadrillas existentes.
A festa tivo lugar baixo unha carpa instalada nas inmediacións do consistorio, aínda que anteriormente viña celebrando no pavillón do colexio Ricardo Gasset. Unha vez finalizada a comida houbo diversas actividades para os máis pequenos organizadas pola asociación A Ouriceira e animación musical.
Os organizadores pretenden converter esta festa de exaltación gastronómica do xabaril nunha das de maior renome da provincia. A celebración naceu hai catro anos debido á importante tradición de caza maior. Ademais, os dous colectivos quixeron agradecer a colaboración desinteresada de membros das dúas agrupacións e dos veciños do Incio, municipio que foi bautizado polo escritor lucense Ánxel Fole como «a terra brava».