Campionato Provincial de A Coruña de Compak Sporting

No día de onte, 11 de abril, voltaba a tan desexada competición ás instalacións deportivas de Río Sar. O campo de tiro “Río Sar” acollía a fase provincial de A Coruña de Compak Sporting baixo a organización da Federación Galega de Caza en A Coruña e coa colaboración vital da Sociedade Deportiva Río Sar.

Preto de medio cento de tiradores enfrontáronse aos 100 pratos dos que constaba a competición repartidos en dous campos a duas voltas. Pratos de diferentes traxectorias e moi técnicos que puxeron de manifesto as habilidades no tiro dos participantes, con maior ou menor acerto.

Era o tirador Daniel Cebreiro García o gran favorito para subir ao máis alto da clasificación e este non defraudou. Cebreiro impuxo o seu dominio dende o primeiro ao derradeiro prato, non dando moitas opcións ao resto de tiradores e rematando cun total de 93 pratos escachados. O segundo posto, con 84 pratos, era para Ángel Mosquera Cornide. O bronce, con 82 pratos, era para José Manuel Torres Parada despois dun desempate con Antonio Iglesias e Marcos Cabado.  

Na categoría de Senior o mellor clasificado era Fernando Sánchez Mancebo con 73 pratos. Eliseo Faraldo Fernández era o campión na categoría de Veteranos namentras que en Master o gañador era Ángel Mosquera Rodríguez.