Baixo a organización da Asociación Galega de Caza Práctica, a colaboración da Sociedade locataria de Caza de  Lalín e o visto bo da Federación Galega de Caza de Pontevedra,  tal e como estaba programado o día 31 do pasado mes de xullo celebrouse en terras do Deza unha proba de “caza práctica” puntuable para a Copa de  Galicia, na que interviñeron 23 cans británicos e 3 continentais, nunha xornada de climatoloxía axeitada en canto a calor, pero na que o vento soprou en certos momentos con bastante intensidade obrigando aos organizadores a trocar o esceario de “Val do Boi” polo  “Maceira”.

O exercicio comezou as 9,30 para concluír sobre as tres da tarde, sendo Xosé Anxo Seco o  xuíz responsable de xulgar as evolucións dos cadelos, acompañándose  no campo dos “aspirantes” Carlos Lalín Ferreiroa e Xesús Blanco. Estes foron os cans que acadaron as mellores puntuacións:

BRITÁNICOS

1º, “Jay do Estrume” (SIM) do ourensán, Luís Méndez Tesouro. Con un EXC.

2º, “Halcón” (SIM) de José Mª Carnota. Con un MB., o igual que os seis primeiros.

3º, “Uva” (SIH) de Pedro Nieto. Con un MB.

CONTINENTAIS

1º, “Fandy de la Judería” (BAM), de Pedro Iglesias. Con un MB.

2º “Denon” de Mirandaola (BAM), de Vicente Cortés. Con outro MB.

Salientar por último, que este acontecemento contou coa novidade de que trofeos e agasallos foron entregados no mesmo campo da proba o concluír o exercicio. Tamén, que o esceario elixido foi catalogado polos participantes de “fenomenal”. E que un xantar que estivo presidido polo novo mandamais da Sociedade de Lalín, Julio Mariño Taboada, e representantes da Federación e da Asociación Galega de Caza Práctica,  puxo o punto e final o evento.