Campionato Galego de Cans de Rastro sobre Coello

O pasado sábado 28 de setembro disputouse a fase final do Campionato Galego de Cans de Rastro sobre Coello organizado pola Federación Galega de Caza en colaboración coa Sociedade de Cazadores Coto Suido.

Foi este Tecor Coto Suido o esceario desta XXIII edición do Campionato Galego de Cans de Rastro sobre coello. Unha xornada marcada pola choiva que dificultou o desenrolo da proba, tanto para xuíces, participantes, cans e organización.

Baixo estas adversas condicións climáticas destacou o lote propiedade de Juan Formoso Raposo composto polos cans “Cora, Lala, Toxo e Peca” adxudicándose o título de Campión Galego con 520 puntos. A tan so 10 puntos, con 510, o subcampionato era para Marcos Riobó Lamas cos cans “Brasa do Suido, Clarima do Suido, Claver do Suido e Diana”. Os cans “Pistón, Tina, Linda e Jara” propiedade de Jaime López Castro facíase co terceiro posto da clasificación final con 505 puntos.

O can “Pistón” propiedade de Jaime López Castro era galardoado como Mellor Can da proba cun total de 145 puntos.

Un xantar de irmandade e a entrega de premios por parte das autoridades alí presentes, entre as que se atopaba o presidente provincial da FGC en Pontevedra Francisco Couselo Castiñeira e o presidente da FGC Javier Nogueira Diz, puxo o punto e final a esta XXIII edición do Campionato Galego de Cans de Rastro sobre Coello.