Campionato Provincial de Pontevedra de Caza Menor con Can

O pasado sábado 10 de novembro tivo lugar no concello pontevedrés de Bueu o Campionato Provincial de Pontevedra de Caza Menor con Can organizado pola Federación Galega de Caza en Pontevedra e contando coa colaboración da Sociedade de Cazadores de Bueu.

A esta fase provincial acudiron un total de 23 cazadores que tomaron a saída ás 9:00 horas. Transcorrido o tempo de competición estipulado pola organización tódolos participantes fixeron a súa entrada en control dentro do horario previsto.

Foi o cazador David Millán Ucha o que con 4 coellos abatidos se impuxo neste campionato converténdose no novo Campión Provincial de Pontevedra de Caza Menor con Can cun total de 1.400 puntos. En segunda posición situouse Juan José Del Río Solla con 3 coellos, un deles capturado polo seu can, que lle reportaron un total de 875 puntos. O participante Julio González Souto tívose que conformar coa terceira posición ao entrar no control cun coello que lle deu unha puntuación de 350 puntos.

A estes tres participantes súmanselles Cristian Pereira Riveiro, José A. Vasconcellos Vicente e Diego Rodríguez Otero; formando a selección provincial de Pontevedra que participará no vindeiro Campionato Galego da especialidade.